อนิมิตฺตญฺจ ภาเวหิ, มานานุสยมุชฺชห;
ตโต มานาภิสมยา, อุปสนฺโต จริสฺสสิฯ
วงฺคีสสุตฺต
ปุจฺฉา – ตตฺถ อาวุโส ทฺวาทสมํ วงฺคีสสุตฺตํ กตฺถ เกน กถญฺจ ภาสิตํฯ
วิสฺสชฺชนา – สาวตฺถิยํ ภนฺเต อายสฺมตา วงฺคีสตฺเถเรน อจิร อรหตฺตปฺปตฺเตน วิมุตฺติสุขปฏิสํเวทินา–
‘‘กาเวยฺยมตฺตา วิจริมฺห ปุพฺเพ, คามาคามํ ปุราปุรํ,
อถทฺทสาม สมฺพุทฺธํ, สทฺธา โน อุปปชฺชถ;
โส เม ธมฺม มเทเสสิ, ขนฺธายตน ธาตุโย;
ตสฺสาหํ ธมฺมํ สุตฺวาน, ปพฺพชิํ อนคาริยํ;
พหุนฺนํ วต อตฺถาย, โพธิํ อชฺฌคมา มุนิ;
ภิกฺขูนํ ภิกฺขูนีนญฺจ, เย นิยามคตทฺทสา;
สฺวาคตํ วต เม อาสิ, มม พุทฺธสฺส สนฺติเก;
ติสฺโส วิชฺชา อนุปฺปตฺตา, กตํ พุทฺธสฺส สาสนํ;
ปุพฺเพ นิวาสํ ชานามิ, ทิพฺพจกฺขุํ วิโสธิตํ;
เตวิชฺโช อิทฺธิปตฺโตมฺหิ, เจโตปริยาย โกวิโทฯ
เอวํ โข ภนฺเต อุทานวเสน ภาสิตํฯ
กาเวยฺย มตฺตา วิจริมฺห ปุพฺเพ; คามาคามํปุราปุรํ,
อถทฺทสาม สมฺพุทฺธํ, สทฺธา โน อุปปชฺชถฯ
โส เม ธมฺมมเทเสสิ, ขนฺธายตน ธาตุโย;
ตสฺสาหํ ธมฺมํ สุตฺวาน, ปพฺพชิํ อนคาริยํฯ
พหุนฺนํ วต อตฺถาย, โพธิํ อชฺฌคมา มุนิ;
ภิกฺขูนํ ภิกฺขุนี นญฺจ, เย นิยามคตทฺทสาฯ
สฺวาคตํ วต เม อาสิ, มม พุทฺธสฺส สนฺติเก;
ตสฺโส วิชฺชา อนุปฺปตฺตา, กตํ พุทฺธสฺส สาสนํฯ
ปุพฺเพนิวาสํ ชานามิ; ทิพฺพจกฺขุ วิโสธิตํ;
เตวิชฺโช อิทฺธิปตฺโตมฺหิ, เจโตปริยายโกวิโทฯ
วนสํยุตฺต
อานนฺทสุตฺต
ปุจฺฉา – วนสํยุตฺเต ปนาวุโส ปญฺจมํ สํคีตํ อานนฺทสุตฺตํ กทา กตฺถ กํ อารพฺภ กิสฺมิํ วตฺถุสฺมิํ เกน กถญฺจ ภาสิตํฯ
วิสฺสชฺชนา – โกสเลสุ ภนฺเต อญฺญตรสฺมิํ วนสณฺเฑ อจิรปรินิพฺพุเต ภควติ อายสฺมนฺตํ อานนฺทํ อารพฺภ ตสฺมิํ วนสณฺเฑ อธิวตฺถาย เทวตาย ภาสิตํฯ อายสฺมา ภนฺเต อานนฺโท อจิรปรินิพฺพุเต ภควติ อติเวลํ คิหิสญฺญตฺติพหุโล วิหรติ, ตสฺมิํ ภนฺเต วตฺถุสฺมิํ–
‘‘รุกฺขมูลคหนํ ปสกฺกิย,
นิพฺพานํ หทยสฺมิํ โอปิย;
ฌาย โคตม มา ปมาโท,
กิํ เต พิฬิพิฬิกา กริสฺสตี’’ติฯ